1Ch 18 | NdeIBE | STEP | Ngokuqhubeka kwesikhathi uDavida wahlasela amaFilisti wawanqoba, wathumba iGathi lemizana eseduzane layo eyayiphethwe ngama-Filisti.

1 Chronicles 18

Ukunqoba KukaDavida

1 Ngokuqhubeka kwesikhathi uDavida wahlasela amaFilisti wawanqoba, wathumba iGathi lemizana eseduzane layo eyayiphethwe ngama-Filisti.

2 UDavida wanqoba njalo amaMowabi aba ngaphansi kwakhe athela kuye.

3 Kanti njalo, uDavida walwa loHadadezeri inkosi yaseZobha, kwaze kwafika eHamathi, esiyamisa umbuso wakhe emmangweni olandela uMfula i-Yufrathe. 4 UDavida wathumba izinqola zakhe zokulwa eziyinkulungwane, abatshayeli bazo abayizinkulungwane eziyisikhombisa lamabutho ahamba phansi ayizinkulungwane ezingamatshumi amabili. Wawaquma imisila wonke amabhiza ezinqola zokulwa kwasala alikhulu kuphela.

5 Kwathi ama-Aramu aseDamaseko ezoncedisa uHadadezeri inkosi yaseZobha, uDavida wawatshaya wawabhuqa ama-Aramu kwafa ayizinkulungwane ezingamakhulu amabili lambili.

6 Wenza izinqaba e-Aramu embusweni waseDamaseko, ama-Aramu aba ngaphansi kombuso wakhe athela kuye. UJehova wanika uDavida ukunqoba kuzo zonke izindawo ayezihlasela.

7 UDavida wathatha amahawu egolide ayephethwe yizikhulu zikaHadadezeri wawathwalela eJerusalema. 8 Kwathi eThebha laseKhuni, okwakuyimizi kaHadadezeri, uDavida wathatha khona ithusi elinengi kakhulukhulu, lelo uSolomoni enza ngalo uLwandle lwethusi, izinsika lezinye izimpahla ezabunjwa ngethusi.

9 Kuthe lapho Towu inkosi yaseHamathi isizwe ukuthi uDavida usenqobe lonke ibutho likaHadadezeri inkosi yaseZobha, 10 wathumela indodana yakhe uHadorami enkosini uDavida ukuthi iyembingelela emenzela amhlophe ngokunqoba uHadadezeri owayekade esilwa impi loTowu. UHadorami wayethwele imihlobohlobo yezimpahla zegolide lesiliva kanye lezethusi.

11 Inkosi uDavida yazinikela izimpahla lezo kuJehova, njengalokho eyayikwenze izimpahla zegolide lesiliva ezazithunjwe kulezozizwe zama-Edomi lamaMowabi, lama-Amoni, lamaFilisti lama-Amaleki.

12 U-Abhishayi indodana kaZeruya watshaya wabhuqa ama-Edomi ayizinkulungwane ezilitshumi laficamibili eSigodini seSawudo.

13 Wenza izinqaba e-Edomi, bonke abase-Edomi baba ngaphansi kombuso kaDavida. UJehova wapha uDavida ukunqoba kuzo zonke izindawo ayesiya kuzo.

Iziphathamandla ZikaDavida

14 UDavida wabusa kulo lonke elako-Israyeli, esenza okuqondileyo lokulungele abantu bakhe bonke.

15 UJowabi indodana kaZeruya wayephethe amabutho; uJehoshafathi indodana ka-Ahiludi engumlobi,

16 uZadoki indodana ka-Ahithubi lo-Ahimeleki indodana ka-Abhiyathari bengabaphristi; uShavisha enguNobhala; 17 uBhenayiya indodana kaJehoyada wayephethe ama-Kherethi lamaPhelethi, lamadodana kaDavida ayeyizikhulu ayeseduzane lenkosi embusweni.